काठमाडौं । नेपाल भ्रमणमा रहेका भारतीय जनता पार्टी (भाजपा)का विदेश विभाग प्रमुख विजय चौथाइवालेले भेटघाटलाई तिव्रता दिएका छन् ।

सोमबार काठमाडौं आएलगतै प्रधानमन्त्रीको सरकारी निवास बालुवाटारमा पुगेका उनले त्यहाँ प्रधानमन्त्री शेरवहादुर देउवासँग भेटघाट गरेका थिए ।

रक्षाबन्धनको दिन पारेर बालुवाटार पुगेका उनले त्यहाँ प्रधानमन्त्रीसँग भेटघाट मात्र गरेनन, फस्ट लेडी प्रधानमन्त्री पत्नी डा. आरजु राणा देउवासँग राखी समेत बाधे ।

त्यसपछि उनको सोमबारको सेडुअल त निक्कै ब्यस्त थियो । शुरुमा पूर्व प्रधानमन्त्री तथा एमाले अध्यक्ष केपी ओलीसँग उनलाई भेटेका थिए । ओलीको निवास वालकोटमै पुगेर उनले ओलीसँग लामो संवाद गरेका थिए ।

ओलीलाई भेटेपछि भारतीय राजदूतावासमा गएर लन्च गरेका चौथाइवाले त्यसपछि भने क्रमशः महन्थ ठाकुर र पुष्पकमल दाहाल (प्रचण्ड)साग भेटवार्ता गरेका थिए ।

कांग्रेस नेताहरुको निमन्त्रणामा नेपाल आएका भनिएका चौथाइवाले भारतीय जनता पार्टी र नेपालका राजनीतिक दलहरूबीचको सम्बन्ध सुमधुर बनाउने भन्दै सबै दलका शिर्ष नेतासँग भेट गरिरहेका छन् ।

भारत सरकार तथा भाजपाले नेपाल र भारतको चिसिएको सम्बन्धलाई सुधार गर्न चाहेको बताइएको छ । भारतले नेपालका भूमि लिपुलेक र कालापानी क्षेत्रमा एकतर्फी सडक निर्माणको काम गदैं लिपुलेक हुँदै चीनको मानसरोवर जोड्ने सडक निमार्ण गरेपछि दुई देशको सम्बन्ध चिसिएको थियो ।

त्यसपछि तत्कालीन प्रधानमन्त्री केपी शर्मा ओलीले कालापानी, लिपुलेक, लिम्पियाधुरालाई समेटेर नयाँ नक्सा जारी गरेपछि दुई देशको सम्बन्ध थप चिसो भएको थियो । दुई देशको सम्बन्धमा चिसो भएकै कारण तत्कालीन परराष्ट्र मन्त्री प्रदीप कुमार ज्ञवालीलाई भारतीय प्रधानमन्त्री नरेन्द्र मोदीले भेट गर्न दिएनन् ।

तर पछिल्लो समयमा केपी शर्मा ओलीले प्रतिनिधि सभाको विघटन गरेर मध्यावधि निर्वाचनको घोषणा गरेसँगै भारतले समर्थन गरेको थियो । मोदीले आफ्नो विशेष प्रतिनिधिको रुपमा ओलीसँग कुरा गर्न रअका प्रमुख सामान्त गोयललाई निम्ताएर बालुवाटारमा रातो कार्पेट ओछ्याएर मध्यरात सम्म गरेको वार्ताले ओली अहिले पनि आलोचित छन् ।

संविधान निर्माणपछि राजनीतिक तहमा हुने सम्बन्धलाई फेरि ओलीले कर्मचारी तहमा संवादमा झारेको र त्यसपछि उनको राष्टवादी चरित्र स्वखलन तिर गएको भन्दै उनका विपक्षीहरुले ओलीको आलोचना गर्ने गरेका थिए ।

ओली प्रधानमन्त्री हुँदैका बेला पनि भारतीय प्रधानमन्त्रीले नेपाल मामिलामा संवाद गर्ने काम गर्नुपरेमा विजय चौथाइवालेलाई नै परिचालन गर्ने गरेको चर्चा कुटनीतिक वृतमा हुने गर्छ ।

तत्कालिन नेकपाभित्र विवाद भईरहदा पनि तत्कालिन अर्थमन्त्री विष्णु पौडेलको निम्तोमा उनी एकपटक नेपाल आएर प्रधानमन्त्री रहेका ओलीलाई भेट गरेका थिए ।

ओली सरकार ढलेर कांग्रेस सभापति शेरवहादुर देउवाको नेतृत्वमा सरकार भएपछि नेपाल भारत विग्रेको सम्वनध सुधारका लागि केही पहल दुवै तर्फकाले लिन खोजेको हुन सक्ने अनुमान लगाउन थालिएको छ । त्यसैको कडीका रुपमा अहिले चौथाइवालेको नेपाल भ्रमण र यहाँको राजनीतिक दलका नेताहरुसँगको भेटवार्ता हुन सक्ने वताईएको छ ।

देउवा प्रधानमन्त्री भएपछि कांग्रेसका सांसद विनोध चौधरी दुई पटक भारत पुगिसकेका छन भने एनपी साउद र विमेलेन्ध निधि पनि एक एक पटक भारत पुगेका थिए । निधि पछिल्लो पटक भने काग्रेस नेता प्रदीप गिरीको स्वास्थ्य अवस्था वुझन दिल्ली पुगेको हुन् ।

चौथाइवालेको नेपाल भ्रमण र यहाँको भेटघाटलाई निक्कै अर्थपूर्ण रुपमा हेरिएको छ । उनको बाबुराम भट्टराईसँगको सम्बन्ध भने चिसो भएकाले उनलाई भेटेका छैन् । भट्टराईले भारतको सस्थापन पक्षले नेपालमा हिन्दु राज्यसहितको राजतन्त्र लाउन लागेको भन्दै भारतीय पत्रिकामै एउटा लेख लेखेपछि चौथाइवालेले विरोध गरेका थिए ।

चौथाइवाले राष्ट्रपति विद्यादेवी भण्डारीसँग पनि भेट्ने तयारी गरेका छन् । चौथाइवाले बुधबार भारत फर्किने तयारीमा छन् । त्यसअघि उनले नेपालका शिर्ष नेतासँग भेट गर्ने छन् । भेटमा नेपाल भारतको चिसिएको सम्बन्धलाई सुधार गर्ने विषयमा छलफल गरिरहेका छन् । नेपालको राजनीतिमा हलचल हुँदा भारतले राजदूत र विशेष प्रतिनिधि मार्फत आफ्नो भुमिका देखिउदै आएको छ । ओली सरकारको समयमा चिसिएको सम्बन्धलाई भारतले देउवाको समयमा सुधार गर्न चाहिरहेको बुझिन्छ ।