काठमाडौं । नेपाली कांग्रेसको क्रियाशील सदस्यता विवाद समाधान समितिले प्रतिवेदन बुझाएको छ । सोमबार साँझ प्रधानमन्त्रीसमेत रहेका शेरबहादुर देउवा निवास बूढानीलकण्ठमा समितिले पार्टी सभापतिलाई प्रतिवेदन बुझाएको हो ।

अब सहमतिमा तलमाथि नगरी महाधिवेशन प्रक्रिया अगाडि बढाउने प्रतिवेदन बुझ्दै सभापति देउवालाई उदृत गर्दै छान समितिका एक सदस्यले मेरोन्युजलाई बताए ।

गत साउन ३० गते पूर्वमहामन्त्री कृष्णप्रसाद सिटौलाको संयोजकत्वमा नेताहरू डा. मीनेन्द्र रिजाल र रमेश लेखक सदस्य रहेको क्रियाशील सदस्यता विवाद समाधान समिति गठन गरिएको थियो ।

उक्त समितिले भदौ २ गते क्रियाशील सदस्यता विवरण बुझाउन समय तोकी जिम्मा दिइएको थियो । तर, समितिले तोकिएको समयभन्दा ५ दिनपछि (आज)मात्र प्रतिवेदन बुझाएको हो ।

कांग्रेसले यही भदौ १८ गतेबाट वडा अधिवेशन गर्ने कार्यतालिका यसअघि नै सार्वजनिक गरिसकेको छ ।