काठमाडौं । नेकपा एमाले स्थायी कमिटीको बैठक आज बस्दै छ । बैठक ललितपुरको च्यासलस्थित तुलसीलाल अमात्य स्मृति प्रतिष्ठानको भवनमा बिहान ११ बजे बस्नेछ ।

आजको बैठकमा ‘तेस्रो धार’मा रहेका नेताहरू पनि सहभागी हुने प्रवक्ता प्रदीप ज्ञवालीले बताएका छन् । सोमबार अध्यक्ष ओलीको निवास बालकोटमा तेस्रो धारका नेताहरूसितको छलफलपछि आजको लागि बैठक बोलाइएको छ ।

सोमबारको छलफलमा तत्कालीन एमाले विवाद समाधान गर्न गठिन कार्यदलमा भएको १० बुँदे सहमतिलाई कार्यान्वयन गर्ने समझदारी भएको ज्ञवालीले जानकारी दिए ।

नेता माधवकुमार नेपालले नयाँ पार्टी दर्ताको लागि निर्वाचन आयोगमा निवदेन दिएका छन् । तर पहिला नेपालका साथमा रहेका केही नेताहरु अहिले ओली र नेपाल दुवैतिर खुलेका छैनन् । उनीहरूले पार्टी एक ढिक्का हुनुपर्नेमा जोड दिँदै आएका छन् । पार्टी एकताका लागि नेपालले पनि नयाँ दल खोल्न नहुने र ओली लचक हुनुपर्ने उनीहरूको जोड छ ।