काठमाडौं । नेकपा एमालेले १० बुँदे सहमति कार्यान्वयन गर्न कार्यदल गठन गरेको छ । मंगलबार तुल्सीलाल अमात्य स्मृति प्रतिष्ठान च्यासलमा बसेको स्थायी कमिटी बैठकले पार्टी एकता कायम राख्न गठित कार्यादले सहमति गरेको १० बुँदे सहमति कार्यान्वयन गर्ने कार्यादल गठन गरेको हो ।

कार्यदलमा महासचिव ईश्वर पोखरेल, उपाध्यक्ष भीम रावल, उपमहासचिव विष्णु पौडेल, घनश्याम भुसाल र स्थायी कमिटी सदस्य सुरेन्द्र पाण्डे र लेखराज भट्ट रहेको प्रवक्ता प्रदीप ज्ञवालीले बताएका छन् । बैठकमा ९ औं महाधिवेशनदेखि माधव कुमार नेपाललाइृ साथ दिदै आएका तर नेपालले नयाँ दल दर्ता गर्दा साथ छोडेका स्थायी कमिटी सदस्य र पूर्व माओवादी नेताहरु पनि सहभागी भएका थिए ।

बैठकले १० बुँदे सहमति कार्यान्वयन गर्न केन्द्रीय कमिटी, केन्द्रीय निकाय, प्रदेश, जिल्लालगायत सबै तहका कमिटी र जनसंगठनहरुलाई २०७५ जेठ २ गते पूर्वको अवस्थामा फर्काएको छ । यस्तै बैठकले नेकपा एमालेले आगामी मंसिर मंसिर १० देखि १२ गतेसम्म काठमाडौंमा पार्टीको १० औं महाधिवेशन गर्ने निर्णय गरेको प्रवक्ता ज्ञवालीले बताए ।

बैठकले नयाँ दल दर्ता गर्न निर्वाचन आयोगमा निवेदन दिएका माधव नेपालसहितका नेतालाई पार्टीमा फर्किएर आउन आह्वान गरेको छ ।