काठमाडौं । नेकपा एमालेका उपाध्यक्ष डा. भीम रावलले एमालेबाट प्रधानमन्त्रीसम्म भएको मान्छेले एमाले काम नलाग्ने पार्टी भन्नु आश्चर्यजनक भएको बताएका छन् ।

उनले बिहीबार सामाजिक सञ्जालमा लेख्दै नवगठित एकीकृत समाजवादी पार्टीका अध्यक्ष माधवकुमार नेपालप्रति यस्तो टिप्पणी गरेका हुन् । उनले एमालेबाट पार्टीको महासचिव, अध्यक्ष र प्रधानमन्त्री भइसकेर एमाले काम नलाग्ने पार्टी हो भन्नु आश्चर्यजनक भएको बताए ।

उनले लेखेका छन्, ‘दक्षिणपन्थी पूँजीवादी नेपाली कांग्रेससँग सहकार्य गरी पदमा जान खोज्नेहरुले नेकपा एमालेलाई १० बुँदे सहमतिका आधारमा एक हुनुपर्छ भन्नेहरुलाई दक्षिणपन्थी देख्नु उदेकलाग्दो हो । अझ यस पार्टीको महासचिव, अध्यक्ष र प्रधानमन्त्री भइसकेर एमाले काम नलाग्ने पार्टी भन्नु आश्चर्यजनक हो ।’

एकीकृत समाजवादी पार्टीका अध्यक्ष नेपालले आज पार्टीले आयोजना गरेको पत्रकार सम्मेलनमा एमाले काम नलाग्ने पार्टी भएकाले नयाँ दल दर्ता गर्नु परेको बताएका थिए ।