काठमाडौँ । सत्तारुढ दल नेपाली कांग्रेसले ३८ जिल्लामा निर्वाचन प्रतिनिधि तोकेको छ । अहिले तोकेको जिल्ला निर्वाचन प्रतिनिधिलाई भदौ १८ गते हुने वडा अधिवेशनसहित जिल्ला अधिवेशनसमेतको निर्वाचन गर्न कार्य क्षेत्रसहित कांग्रेसले प्रतिनिधि खटाएको हो ।

निर्वाचन अधिकृतहरू आजैदेखि आफूले जिम्मेवारी पाएको जिल्लामा जाने भएका छन् । निर्वाचन समितिका संयोजक महादेवप्रसाद यादवले ३८ जिल्लामा निर्वाचन अधिकृत खटाइएको जानकारी दिए । उनीहरू आजै तोकिएको जिल्लामा खटिने उनले बताए ।

‘भदौं १८ गतेदेखि वडा अधिवेशन शुरु गर्ने कार्य तालिकाअनुसार निर्वाचन समितिले ३८ जिल्लामा निर्वाचन प्रतिनिधि तोकेर हामीले पठाएका छौँ, बाँकी जिल्लामा पनि केही दिनभित्रै तोकेर सक्छौँ,’ निर्वाचन समितिका संयोजक यादवले भने ।

यसरी तोकिएकामध्ये अधिकांश कानुन व्यवसायीहरू रहेका छन् । केहीमा भने प्राध्यापक र नेपाल शिक्षक संघका प्रतिनिधिलाई पनि जिम्मेवारी दिइएको छ ।

बाँकी जिल्लामा समेत चाँडै प्रतिनिधि पठाउने कांग्रेसले जनाएको छ ।