काठमाडौँ । सत्तारुढ दल नेपाली कांग्रेसले स्थानीय तहको अधिवेशन कार्य तालिकामा हेरफेर गर्ने भएको छ । क्रियाशील सदस्यता विवाद, जिल्ला सभापतिको आन्दोलन र निर्वाचन समितिको तयारीलाई मध्यनजर गर्दै भदौ १८ गतेदेखि सुरु हुने भनिएको वडा अधिवेशन केही पछि धकेलिएको हो । यससँगै अब कांग्रेसको वडास्तरीय अधिवेशन भदौ २२ गते हुने भएको हो ।

बिहीबार कांग्रेस सभापति शेरबहादुर देउवा र वरिष्ठ नेता रामचन्द्र पौडेलबीच जिल्ला सभापतिको माग सम्बोधन गर्नेलगायत विषयमा छलफल भएको थियो । यस क्रममा वडा स्तरीय अधिवेशन केही दिन सार्नेमा छलफल भएको थियो ।

भदौ २२ गते वडा अधिवेशन सुुरु भए पनि अधिवेशनको बाँकी मिति यथावत हुने भएको छ । सभापति देउवा र वरिष्ठ नेता पौडेलबीच सबै वडामा एकै दिन अधिवेशन गर्ने सहमतिसमेत भएको छ ।