काठमाडौं । नेकपा एकीकृत समाजवादी पार्टीका अध्यक्ष तथा पूर्वप्रधानमन्त्री झलनाथ खनाललाई सरकारले दिएको उपचार रकम फिर्ता गर्न माग गर्दै सर्वोच्च अदालतमा रिट दायर भएको छ ।

आइतबार अखिल छैठौंका अध्यक्ष विमल पोखरेलले खनाललाई सरकारले दिएको उपचार खर्च फिर्ता गर्न माग गर्दै सर्वोच्चमा रिट दायर गरेका हुन् । रिटमा खनालले आफ्नो स्वास्थ्य उपचार विदेशमा गरेकाले उनको उपचारको रकम सरकारले व्यहोर्नु गैरकानुनी हुने रिटमा उल्लेख गरिएको छ ।

यस्तै रिटमा खनाललाई सरकारले दिएको उपचार रकम फिर्ता गर्न माग गरिएको छ । भारतको एपोलो अस्पतालमा उपचाररत मिर्गौला रोगबाट पीडित खनालको उपचारका लागि केपी शर्मा ओली नेतृत्वको सरकारले ३१ लाख रुपैयाँ दिने निर्णय गरेको थियो ।