काठमाडौँ । बागमती प्रदेशमा नेकपा एमालेबाट निर्वाचित १२ सांसदले नेकपा एकीकृत समाजवादी (एस)मा जाने भएसँगै अष्टलक्ष्मी शाक्यको पद धरापमा परेको छ । गत २ गते मुख्यमन्त्री बनेकी शाक्यको पद दुई हप्ता नहुँदै धरापमा परेको हो ।

कूल १०९ सदस्यीय भएको बागमती प्रदेशसभामा एमालेका तर्फबाट सभामुखसहित ५६ जना सांसद रहेका थिए । १२ जना सांसदले एमाले छाड्ने भएसँगै मुख्यमन्त्रीले विश्वासको मत लिनु पर्ने भएको छ ।

तत्कालीन मुख्यमन्त्री डोरमणि पौडेलले राजीनामा दिँदै शाक्यलाई प्रदेश संसदीय दलको नेता बनाएका थिए । लगत्तै प्रदेश प्रमुख विष्णु प्रसाईले उनलाई एमालेको एकल बहुमतमा मुख्यमन्त्री नियुक्त गरेका थिए ।

सरकारले दल विभाजनसम्बन्धि अध्यादेश जारी गरेसँगै विभाजन भएको एमालेका १२ सांसदले नेकपा एस रोजेका थिए । योसँगै एमाले सांसदको संख्या ४४ मात्रै भएको छ ।

प्रदेशमा सरकार गठन गर्न ५५ सांसद आवश्यक हुनु पर्दछ ।