काठमाडौँ । विश्वभर करिब पाँच अर्ब मानिसले कोरोनाविरुद्धको खोप पाएका छन् । विश्व स्वास्थ्य संगठन (डब्ल्यूएचओ)को तथ्याकंअनुसार ५ अर्ब मानिसले कोरोनाविरुद्धको खोपको पहिलो मात्रा लगाएका हुन् ।

डब्ल्यूएचओको नेपालस्थित खोप कार्यक्रमका डा. विनोद बुराले विश्वका न्यून आय भएका देशका १.६ प्रतिशतमात्रै खोप पाएका जानकारी दिए ।

तेस्रो डोज कति आवश्यक

डब्ल्यूएचओका डा. बुराले खोपमा समानता नभइरहेको अवस्थामा सबैलाई खोपको पहुँचमा पुर्याउनु अहिलेको आवश्यकता रहेकाले बुस्टर डोजका लागि सुझाव नदिएको जानकारी दिए । उनका अनुसार पूर्ण खोप पाएकाले बुस्टर डोज लिनु पर्दैन् ।

अहिलेसम्म पनि पूर्ण खोप लिएकाहरूले बुस्टर डोज दिनु पर्ने वैज्ञानिक प्रमाण नभेटिएको उनको भनाई छ । उनले भने, ‘अहिले विभिन्न कोरोनाविरुद्धका खोपहरू आएका छन्, जसमा कतिपयले ९५ प्रतिशतसम्म भन्दा कम काम गरेका छन् त्यसको पनि अध्ययन भइरहेको छ ।’

उनले २०२१ को अन्त्यसम्म न्यून आय भएका देशमा १० प्रतिशत जनसंख्यालाई खोप लगाउने योजना रहेको जानकारी दिए । उनले कोभिड आफै अझै पनि अध्ययनको विषय रहेकाले खोपको सम्बन्धमा थप अध्ययन भइरहेको बताए ।

नेपालमा हालसम्म ५३ लाख १७ हजार ४८३ जनाले पहिलो खोप पाइसकेका छन् । यस्तै, ४३ लाख ९६ हजार ४०२ जनाले दुवै डोज खोप पाएका छन् ।

हाल विश्वभर २१ करोड ८० लाखभन्दा बढी मानिस कोरोनाबाट संक्रमित भएका छन् ।