काठमाडौं । बाग्मती प्रदेशको मुख्यमन्त्रीमा माधव नेपाल नेतृत्वको नवगठित नेकपा एकीकृत समाजवादी पार्टीले दाबी गरेको छ ।
नेकपा एमालेका १२ जना प्रदेशसभा सांसदहरुले मंगलबार प्रदेश निर्वाचन कार्यालयमा पुगेर आफूहरु एकीकृत समाजवादी पार्टीमा आवद्ध भएको स्पष्ट गरेका थिए ।

१२ जना प्रदेशसभा सांसदहरुले हेटौंडास्थित प्रदेश निर्वाचन कार्यालयमा पुगेर आफूहरु एकीकृत समाजवादी पार्टीमा आवद्ध भएको सनाखत गरेसँगै सो पार्टीका नेता राजेन्द्र पाण्डेले मुख्यमन्त्रीमा आफ्नो पार्टीको दाबी रहेको प्रतिक्रिया दिएका छन् ।

आगामी भदौं २३ गते त्यहाँको प्रदेश निर्वाचन कार्यालयले एमाले छाडेर नेकपा एकीकृत समाजवादी पार्टीमा प्रवेश गर्ने सांसदहरुको संख्या सार्वजनिक गर्ने जनाएको छ ।

भदौ २३ गतेपछि नयाँ सरकार गठनको प्रक्रिया सुरु गर्ने नेता पाण्डेले जानकारी दिए । १२ जनाको सनाखत भएको र अरु साथीहरु पनि थप हुने भन्दै पाण्डेले त्यसपछि आफ्नो दलको तर्फबाट संसद सचिवालयमा पेश गर्ने बताए ।

त्यो पेश गरेको दिनदेखि नै अहिलेको सरकार अल्पमतमा परेको उनको भनाइ थियो । अबको सरकार आफ्नो नेतृत्वमा बन्ने पनि नेता पार्टीको भनाइ छ । आफू नै सबै दलको सहमतिको क्यान्डिडेट रहेको समेत नेता पाण्डेले दाबी गरेका छन् ।