काठमाडौँ । कर्णाली प्रदेश एमालेका ३ जना सांसदले पार्टी परित्याग गरी नवगठित नेकपा एकीकृत समाजवादी (एस) रोजेका छन् । एमाले छाड्नेहरूमा चन्द्रबहादुर शाही, पदम रोकाय र देवी ओली रहेका छन् ।

उनीहरूले आज सुर्खेतस्थित निर्वाचन आयोगको कार्यालयमा पुगेर नेकपा एसको पक्षमा सनाखत गराउने भएका हुन् । कर्णाली प्रदेशसभामा एमालेबाट २० सांसद रहेका थिए ।

यसअघि नै पार्टीले प्रकाश ज्वाला, कुर्मराज शाही, अम्मरबहादुर थापा र नन्दसिंह बुढालाई कारबाही गरी पद मुक्त बनाएका थिए । उनीहरू फ्लोर क्रस गरी नेकपा माओवादी केन्द्र नेतृत्व सरकारका मुख्यमन्त्री महेन्द्र बहादुर शाहीलाई मत दिएका थिए ।

सभामुखसहित १६ सांसद रहेको एमालेबाट ३ जना नेकपा एस रोजेसँगै एमालेमा सभामुखसहित १३ सांसद रहेका छन् ।