काठमाडौँ । सरकारले प्रतिनिधिसभाको अधिवेशन बोलाउन राष्ट्रपतिसमक्ष सिफारिस गरेको छ । शनिबार बसेको मन्त्रिपरिषद्को बैठकले आगामी २३ गते दिउँसो ४ बजे बस्ने गरी प्रतिनिधिसभा र राष्ट्रियसभाको अधिवेशन बोलाउन सिफारिस गरेको हो ।

अधिवेशनमा सरकारले यसअघि ल्याएको राजनीतिक दल विभाजनसम्बन्धी अध्यादेश प्रस्तुत गर्ने भएको छ । आगामी अधिवेशनमा सरकारले अध्यादेशमार्फत् ल्याएको बजेटको प्रतिस्थापन गर्ने विधेयकसमेत ल्याउने भएको छ ।

आज बिहान प्रधानमन्त्री शेरबहादुर देउवाले सभामुख अग्निप्रसाद सापकोटासँग संसद् अधिवेशन बोलाउने विषयमा छलफल गरेका थिए । यसैगरी आजै प्रधानमन्त्रीसँग सत्ता साझेदार दल नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ र नेकपा एकीकृत समाजवादीका अध्यक्ष माधव नेपालसँग समेत छलफल गरेका थिए ।