सुर्खेत । १६ वर्षीया किशोरीलाई बलात्कार गरेको आरोपमा प्रहरीले सुर्खेतबाट नौ जनालाई पक्राउ गरेको छ ।

किशोरीले दिएको किटानी जाहेरीका आधारमा प्रहरीले मंगलबार नौ जनालाई पक्राउ गरेको हो ।

पक्राउ पर्नेमा पञ्चपुरीका डम्बर वादी, गणेश वादी, युवराज शाही, शोभा शाही, बाबुराम पुरी, प्रेम बुढाथोकी, शेरबहादुर सार्की, ओम दर्लामी र प्रेमबहादुर शाही रहेका छन् ।

पक्राउ परेका अधिकांश यातायात मजदुरहरु रहेको सुर्खेतका प्रहरी प्रमुख एसपी पदमबहादुर विष्टले जानकारी दिए । बलात्कृत किशोरी गर्भवतीसमेत रहेको प्रहरीले जनाएको छ ।

चौकुने गाउँपालिका घर भई पञ्चपुरी नगरपालिकामा बस्दै आएकी ती किशोरीले विभिन्न व्यक्तिबाट आफूमाथि पटकपटक बलात्कार भएको भन्दै इलाका प्रहरी कार्यालय बाबियाचौरमा उजुरी दिएकी थिइन् ।

जिल्ला अदालतबाट म्याद थप गरी उनीहरुमाथि थप अनुसन्धान अगाडि बढाइएको विष्टले जानकारी दिए ।