काठमाडौं । महन्थ ठाकुर नेतृत्वको लोकतान्त्रिक समाजवादी पार्टी (लोसपा) शेरबहादुर देउवा नेतृत्वको सरकारमा सहभागी नहुने भएको छ ।

सरकारमा सहभागी नहुने भएकाले बुधबारको संघीय संसदको बैठकमा प्रतिपक्षको सिटमा बसेको छ ।

प्रधानमन्त्री देउवालाई विश्वासको मत दिएको उक्त पार्टीले तत्काल सरकारमा नजाने निर्णय लिँदै प्रतिपक्षमा रहने भएको हो ।

देउवालाई विश्वासको मत दिएको भए पनि संसदमा प्रतिपक्षको भूमिका रहने निर्णय लिएको लोसपाका वरिष्ठ नेता राजेन्द्र महतोले जानकारी दिए ।

देउवा नेतृत्वको सरकारलाई समर्थन गरेको लोसपाले गुण र दोषका आधारमा समर्थन गर्ने जनाएको छ ।

लोसपाकै माग बमोजिम संसद सचिवालयले प्रतिपक्षीतर्फको कुर्सी व्यवस्थापन गरेको थियो ।