काठमाडौँ । सत्ता पक्षीय गठबन्धनको बैठक बस्दै छ । सत्ता गठबन्धनमा आवद्ध पाँच दलका शीर्ष नेताहरुको बैठक शुक्रबार बिहान नौ बजे प्रधानमन्त्री निवास बालुवाटारमा बस्ने प्रधानमन्त्रीको सचिवालयले जनाएको छ ।

बैठकमा अमेरिकी सहयोग परियोजना एमसीसी, मन्त्रिपरिषदको पूर्णता लगायतका विषयमा छलफल हुने बताइएको छ । सत्ता गठबन्धनमा किचोलो भएका कारण कांग्रेस सभापति शेरबहादुर देउवा प्रधानमन्त्री भएको दुइ महिना हुनै लाग्दा पनि मन्त्रिपरिषद्ले पूर्णता पाउन सकेको छैन । आजको बैठकले मन्त्रीको भागभण्डा मिलाएर छिटो नै मन्त्रिपरिषद् विस्तार गर्ने जनाइएको छ ।

यस्तै बैठकमा एमसीसीबारे पनि छलफल हुने छ । २०७४ भदौ २९ मा शेरबहादुर देउवा नेतृत्वको तत्कालीन सरकार र एमसीसीबीच करिब ५५ अर्ब रुपैयाँ अनुदान सहयोग सम्बन्धी सम्झौता भएको थियो । तर उक्त सम्झौता प्रतिनिधिसभाबाट अनुमोदन हुन सकेको छैन ।

सम्झौता कार्यान्वयनको प्रगतिबारे बुझ्न एमसीसी उपाध्यक्ष फातिमा सुमार नेतृत्वको टोली बिहीबार काठमाडौं आएर एमाले अध्यक्ष केपी शर्मा ओली, नेकपा एकीकृत समाजवादीका अध्यक्ष माधव कुमार नेपाल र जनता समाजवादी पार्टी जसपाका अध्यक्षद्वय उपेन्द्र यादव र डा. बाबुराम भट्टराईसँग छलफल गरेको छ ।