काठमाडौँ । केही दिनयता नेकपा एमालेले प्रतिनिधिसभा बैठकमा नाराबाजी र होहल्ला गर्दै आएको छ । संसद बैठक चल्न नदिने रणनीतिका साथ एमालेले लगातार संसदमा नाराबाजी जारी राखेका छन् ।

भदौ २३ गतेबाट शुरु भएको प्रतिनिधिसभाको नवौं अधिवेशनलाई एमालले चल्नै नदिने रणनीति बनाएपनि त्यहीबीचमा केही महत्वपूर्ण अध्यादेशहरु पास भइसकेका छन् ।

अवरोधकैबीच सरकारले प्रतिस्थापन विधेयकमार्फत बजेटसमेत संसदमा पेश गरिसकेको छ ।

संसदको नवौं अधिवेशन शुरु भएदेखि नै एमालेले पार्टी फुटाउने अध्यादेश ल्याएर सभामुखले एमाले फुटाउन भूमिका खेलेको आरोप लगाउँदै आएको छ ।

नेकपा एमालेबाट विभाजित भई माधव नेपाल नेतृत्वको नेकपा (एकीकृत समाजवादी)मा गएका १४ जना सांसदलाई संसदमा रोक्ने एमाले रणनीति असफल भएको छ ।

निर्वाचन आयोगबाट नयाँ पार्टीको मान्यता पाइसकेका सांसदहरुलाई आफूले कारबाही गरेकाले संसद बैठकमा रोक्नुपर्ने माग एमालेले गर्दै आएको छ ।

बैठक शुरु भएदेखि नै मुर्दाबादको नारा लगाउने गरेका एमाले सांसदहरुले आलोपालो गरेर नारा लगाइरहेका छन् । तर संसदमा उग्र नारा लगाउनेमा एमाले सांसद महेश बस्नेत र निरुदेवी पाल देखिन्छन् । जसले सभामुखविरुद्ध नै मुर्दावादको नारा भट्याइरहेका छन् ।

बस्नेत एमाले अध्यक्ष केपी शर्मा ओलीका सबैभन्दा निकट मानिन्छन् । उनी तत्कालिन युवा संघ तथा युथफोर्सको अध्यक्षसमेत थिए । पार्टीमा विवाद उत्पन्न भएकाबेला उनै बस्नेत तत्कालिन ओली गुटको कार्यक्रममा देशैभर पुगे ।

सभामुखविरुद्ध नै मुर्दावादको नारा घन्काउने अर्की सांसद पाल पनि युवा संगठन हुँदै संसदमा प्रवेश गरेकी हुन् । बस्नेतपछि युवा संघको नेतृत्व गरेकी उनी पार्टी अध्यक्ष ओलीकै कृपाले संसदको टिकट पाएकी थिइन् ।

संसदमा सभामुखविरुद्ध नै यस्ता नारा लगाउन नपाउनै संसदीय विधानमा उल्लेख छ । तर बस्नेत र पाल लगायतका सांसदहरुले सभामुखविरुद्ध नै नाराबाजी गर्न अगाडि देखिएका छन् ।