काठमाडौं । सरकारी चिकित्सक संघले स्वास्थ्य मन्त्रालयको सचिव स्वास्थ्य सेवाकै विशेषज्ञ चिकित्सक हुनुपर्ने माग गरेको छ ।

संघले आइतबार विज्ञप्ति जारी गरी स्वास्थ्यको महत्व बुझेर बाग्मति प्रदेशमा अलग्गै स्वास्थ्य मन्त्रालय प्रस्ताव स्वागतयोग्य भए पनि दरबन्दी तेरिज प्रस्ताव भएकोप्रति संघले गम्भीर ध्यानाकर्षण भएको जनाएको छ ।

संघका अध्यक्ष डा. रबिन खड्का र महासचिव डा. कीर्तिपाल सुवेदीद्वारा हस्ताक्षरित विज्ञप्तिमार्फत मानव जीवनसँग प्रत्यक्ष जोडिएको स्वास्थ्य सेवालाई गैरस्वास्थ्य समूहको र स्वास्थ्य बिधाबारे ज्ञान नै नभएको अप्राविधिक नेतृत्वको हातमा सुम्पिन खोज्नु हास्यास्पद र गैरजिम्मेवार भन्दै खेद प्रकट गरिएको छ ।

अन्य सेवा समूहजस्तै मेडिकल अधिकृतदेखि विशेषज्ञ चिकित्सकसम्मलाई मन्त्रालय, विभाग, महाशाखा, शाखा आदिमा अनिवार्य दरबन्दी राखि स्वास्थ्य नीति निर्माणलाई थप बौद्धिक, सवल, दुरदर्शी र गुणस्तरी होस भन्नेतर्फ तत्काल दरबन्दी तेरिजमा सुधार गर्न संघले ध्यानाकर्षण गराएको छ ।