काठमाडौं । नेपाल पत्रकार महासंघ लुम्बिनी प्रदेश समितिका कार्यसमिति सदस्य विन्दुकुमार चौहानको निधनप्रति नेपाल पत्रकार महासंघले शोक ब्यक्त गरेको छ ।

महासंघका महासचिव रोशन पुरीले बुधबार शोक वक्तब्य जारी गर्दै पत्रकार चौहानप्रति हार्दिक श्रद्धाञ्जली अर्पण गर्दै दिवंगत आत्माको चिरशान्तिको कामना गरेका छन् ।

पत्रकार चौहानको कोरोना संक्रमणका कारण ५३ वर्षको अल्पायुमै भएको थियो ।

कोरोना संक्रमणको लक्षण देखिएपछि होम आइसोलेसनमा रही कोरोना ठीक भइसकेका पत्रकार चौहानको स्वास्थ्यमा एक्कासी समस्या आएपछि पाँच दिनअघि भैरहवास्थित युसिएम अस्पतालमा भर्ना गरिएको थियो ।

उपचारका क्रममा फोक्सोमा समस्या आई निमोनिया देखिएका चौहानको उपचाररत अवस्थामा बुधबार विहान २ बजे निधन भएको थियो । स्वर्गीय चौहानका श्रीमती, तीन छोरी र चार छोरा छन् ।

दुई दशकदेखि पत्रकारितामा सक्रिय चौहानले बुटवलस्थित लुम्बिनी दैनिकबाट पत्रकारिता सुरु गरेका थिए ।

कोरोनाकै कारण अहिलेसम्म २५ जना पत्रकारको निधन भएको छ भने एक हजारभन्दा बढी पत्रकार संक्रमित भएका छन् ।