काठमाडौं । आईसीसी वल्डकप लिग–२ मा ओमानविरुद्धको खेलमा नेपालले सात विकेटको जीत निकालेको छ ।

५० ओभरको खेलमा नेपालले मात्र १८ दशमलव २ ओभर खेल्दा १ सय ९० बल बाँकी छँदै ३ विकेटको क्षतिमा लक्ष्य भेट्टाएको हो ।

नेपालका ओपनर कुशल भुर्तेल ६ रन बनाएर आउट भए भने आसिफ शेखले ४४ बल खेल्दा ७ चौकाको मद्दतमा ४० रन जोडे ।

रोहित पौडेल ७ बल खेल्दा १ चौकाको मद्दतमा ६ रन जोड्दा कुशल भुर्तेल ८ बल खेल्दा एक चौकाको मद्दतमा ६ रनमै आउट भए ।

शरद भेषवाकरले ६ बल खेल्दा १ रन जोड्दै अविजित रहे भने ज्ञानेन्द्र मल्ल ४६ बल खेल्दा २ छक्का र ४ चौकाको मद्दतमा ५२ रन जोडेर अविजित रहे ।

यसअघि अल अमिरात क्रिकेट मैदानमा टस हारेर ब्याटिङको निम्तो पाएको ओमानले ३७ ओभर १ बलमा अलआउट हुँदै १ सय २१ रन बनाएको थियो ।

ओमानका लागि कप्तान जिशन मक्सुदले सर्वाधिक ४१ रन बनाए ।

जतिन्दर सिंहले १३ रन जोड्दा नसिम खुसी १२ रनमा आउट भए । सन्दीप गौडले ८ रन, आयन खानले ७ रन जोड्दा सुफ्यान मेहमुद र मोहमद नदीमले ४४ रन जोडे ।

नेपालका करण केसी र सन्दीप लामिछानेले ४/४ विकेट तथा शरद भेषवाकरले २ विकेट लिएका थिए ।

लिग–२ मा चौथो जित हात पारेको नेपाल ८ अंक जोड्दै अंकतालिकामा चौथो स्थानमा उक्लेको छ । 

२०२० फेब्रुअरीमा नेपालमै भएको लिग–२ को सिरिजमा नेपाल ओमानसंग दुवै खेलमा पराजित भएको थियो ।