काठमाडौं । नेपाली कांग्रेसका उपसभापति विजयकुमार गच्छदारले ललितानिवास जग्गा प्रकरणमा प्रतिशोध साँध्नका लागि मुद्दा चलाइएको जिकिर गरेका छन् ।

मगलबार काठमाडौंमा पत्रकार सम्मेलन गर्दै मलाई तत्कालीन सरकारले राजनीतिक प्रतिशोधका आधारमा फसाउने दूषित उद्देश्यले मुद्दा चलाएको बताए ।

उनले मेरो ५० वर्षको राजनीतिक जीवन ध्वस्त पार्ने उद्देश्यका साथ अख्तियार दुरुपयोग अनुसन्धान आयोग लागेको आरोप लगाए ।

‘ममाथि लगाइएका आरोपका साथ संलग्न प्रमाण कागजातहरु अध्ययन गरिएमा मेरोविरुद्ध लगाइएका आरोपहरु झूटा हुन् भन्ने प्रमाणित हुन्छ,’ उनले भने– ‘मलाई तत्कालिन सरकारले पूर्वाग्रहरुपमा मुछेको हुँदा त्यसलाई प्रतिशोध साँधेर फसाएको भनेको हुँ । ’ आफू डेढ वर्षपछि यसरी सार्वजनिक रुपमा आएको पनि उनले बताए ।

कांग्रेसको सरकार आएर मलाई विशेष अदालतबाट धरौटीमा रिहा नगरेको उनले बताए । उनले भने, ‘प्रधानमन्त्री शेरबहादुर देउवा नियुक्त भएको दोस्रो दिन नै हाजिर भयो, यो कांग्रेसको सरकार आएपछि भन्ने होइन, मेरो पहिला नै मुद्दा बेरितको उपस्थिति हुने गरी तामेल गरिएको थियो ।’

ललितानिवास जग्गा प्रकरणमा मुछिएपछि लामो समय सक्रिय राजनीतिबाट गुमनाम भएका गच्छदार गत ३० असारमा विशेष अदालतबाट १० लाख धरौटीमा छुटेका थिए ।