बैतडी । एक व्यापारीको हत्या आशंकामा प्रहरीले ५ जनालाई नियन्त्रणमा लिएको छ । सुर्नया गाउँपालिका ४ को लेकडाँडा घर भई स्थानीय सन्सेरीमाडौँमा मासु पसल सञ्चालन गर्दै आएका ५५ वर्षीय कमलसिंह महरा आज बिहान मृत फेला परेका थिए ।

उनको टाउको, छाती र शरीरका विभिन्न भागमा चोट देखिएको र अनुसन्धानका क्रममा हत्यामा भएको पुष्टि भएको थियो । हत्यामा संलग्नको आशंकामा ५ जनालाई नियन्त्रणमा लिइएको प्रहरी निरीक्षक दर्शन खड्काले जानकारी दिए ।

उनले नियन्त्रणमा लिइएका सबै स्थानीयवासी भएको र अनुसन्धान चलिरहेकाले उनीहरूको नाम खुलाउन नमिल्ने बताए । शव देखेपछि स्थानीयवासीले प्रहरीलाई खबर गरेका थिए ।

अनुसन्धानका लागि पाटन इलाका प्रहरी कार्यालयका प्रमुख राजेश शाही नेतृत्वको टोली घटनास्थलमा खटिएको छ ।