काठमाडौं । हाँस्य कलाकार तथा निर्माता दीपकराज गिरीले नेपाली फिल्म रिलिज गर्न पनि हिन्दी फिल्म नै कुर्नुपर्ने अवस्था आउनु राम्रो नरहेको बताएका छन् ।
‘अहिलेको संकटमा हामीलाई हल चलाउन विदेशी फिल्म नै चाहियो,कमसेकम दसैंमा रिलिज गर्ने डेट तोकेर तयार भएर बसेका साथीहरुले त आँट गर्नुपर्ने थियो नि । सहज हुँदा त एक आपसमा भिड्ने अप्ठ्यारो बेला चाहिँ ?’ गिरीले सामाजिक सञ्जाल फेसबुकमा लेख्छन् ।

उपत्यकामा करिब एक महिना अगाडि नै सिनेमा हल खोल्ने अनुमति पाइसके पनि हालसम्म चलचित्र रिलिज हुन सकेका छैनन् । देशभरका हल पनि नखुलेका कारण दसैंमा पनि चलचित्र रिलिज गर्न नसकिएको निर्माताहरुले बताउँदै आएका छन् ।

तिहारमा हिन्दी चलचित्र शूर्यवंशी आउने र त्यसपछि मात्रै हलमा दर्शकको फ्लो हेरेर चलचित्र रिलिज गर्ने वा नगर्ने भन्ने मनस्थितिमा निर्माताहरुमा देखिन्छ ।