काठमाडौँ । नेकपा एमालेको प्रथम विधान महाधिवेशनमा प्रस्तुत भएका तीन प्रतिवेदनमाथिको छलफल जारी छ । गत शुक्रबारदेखि ललितपुरको गोदावरीमा सुरु भएको महाधिवेशनमा पार्टी अध्यक्ष केपी शर्मा ओलीको राजनीतिक प्रतिवेदन, महासचिव ईश्वर पोखरेलको सांगठनिक प्रतिवेदन र उपमहासचिव विष्णुप्रसाद पौडेलको विधान संशोधन प्रतिवेदन पेश गरेका थिए ।

पार्टीका तीन जना नेताहरूले प्रस्तुत गरेको प्रतिवेदनमाथि शनिबार बिहानदेखि समूहगत छलफल सुरु भएको थियो । यसका लागि विभिन्न तवरबाट १० वटा समूह विभाजन गरिएको थियो ।

जम्मा चार घण्टा मात्रै छलफल गर्न छुट्याइएको समयपछि समूहले तयार पारेको समूहको प्रस्तुति पेश गर्न सुरु भएको थियो । अब दुई समूहको प्रस्तुति हुन बाँकी रहेको एमालेले जनाएको छ ।

प्रतिवेदनमाथिको समूहगत प्रस्तुति सकिएसँगै प्रतिवेदन प्रस्तुतकर्ताले जवाफ दिने कार्यसूची रहेको छ । महाधिवेशनमा देशभरबाट ६ हजार ३४७ प्रतिनिधि सहभागी भएका छन् ।