काठमाडौँ । स्वास्थ्य तथा जनसंख्या राज्यमन्त्री उमेश श्रेष्ठले दसैँलगत्तै १८ वर्षभन्दा कम उमेरका बालबालिकालाई कोरोना भाइरसविरुद्धको खोप लगाउन सुरु गरिने जानकारी दिए । आइतबार कान्ति बाल अस्पताललाई बुद्धिष्ट चु जी च्यारिटी फाउण्डेशनले स्वास्थ्य सामग्री हस्तान्तरण गर्न आयोजित कार्यक्रममा बोल्दै उनले बालबालिकाका लागि एक करोड खोप आउने सुनिश्चित भएको बताए ।

उनले यसका लागि ४० लाख मोर्डना र ६० लाख फाइजर खोप खरिदको व्यवस्था गरिसकिएको बताए । दसैँपछि एक लाख फाइजर खोप आउने उनले जानकारी दिए ।

‘सरकारको तर्फबाट यसलाई उच्च प्राथमिकता दिएर एक करोड खोप जसमा मोर्डना ४० लाख र फाइजर ६० लाख खोपको खरिद गर्ने व्यवस्था सुनिश्चितता भइसकेको र यो दसैँलगत्तै एक लाख फाइजर खोप आउने छ,’ उनले भने, ‘त्यसपछि फागुनसम्ममा एक करोड खोप आइसक्छ ।’

राज्यमन्त्री श्रेष्ठले कोभिड १९ रोकथाम तथा नियन्त्रणको सम्बन्धमा मृत्यु भएका स्वास्थ्यकर्मीको बालबच्चालाई अध्ययनका लागि छात्रवृत्ति प्रदान गरिने बताए । एक कार्यक्रमका बीच फाउण्डेशनले कान्ति बाल अस्पताललाई २५ वटा भेन्टिलेटरलगायतको स्वास्थ्य सामग्री हस्तान्तरण गरेको छ ।

फाउण्डेशनले ४१ करोड ४८ लाख रुपैयाँ बराबरको स्वास्थ्य सामग्री कान्ति बाल अस्पताललाई हस्तान्तरण गरेको बुद्धिष्ट चु जी च्यारिटी फाउण्डेशनका नेपाल प्रतिनिधि महेश नकर्मीले जानकारी दिए ।