काठमाडौँ । माल्दिभ्समा जारी साफ च्याम्पियनशिपको दुई खेल्दा नेपालले इतिहास बनाएको छ । सोमबार राति भएको खेलमा नेपालले श्रीलङ्कालाई ३–२ गोल अन्तरले पराजीत गर्दै इतिहास बनाएको हो ।

नेपालले श्रीलङ्कामाथि जित निकाल्दै प्रतियोगितामा २२ वर्षपछि नयाँ इतिहास बनाएको हो । यसअघि नेपालले श्रीलङ्कालाई सन् १९९९ मा भारतमा भएको चौथो संस्करमा पराजीत गरेको थियो ।

साफ च्याम्पियनशिपको चौथो संस्करमा पनि नेपालले श्रीलङ्कालाई ३–२ गोल अन्तरले नै पराजीत गरेको थियो । जारी १३ औँ संस्करमा समेत नेपालले श्रीलङ्कालाई ३–२ गोलले नै पराजीत गर्नु संयोग भएको छ ।

प्रतियोगितमा नेपालका तर्फबाट सुमन लामाले ३३ औँ मिनेटमा गोल गरेका थिए । उनको गोलसँगै नेपालले श्रीलङ्काविरुद्ध १–० गोलले अग्रता लियो । यस्तै, खेलको ५१ औँ मिनेटमा अञ्जन विष्टले गोल गरेका थिए भने ८६ औँ मिनेटमा परिवर्तित खेलाडीका रुपमा मैदान प्रवेश गरेका आयुश घलानले गोल गरे ।

यस्तै, श्रीलङ्काको तर्फबाट ह्यामिल्टनले ५७ औँ मिनेटमा र खेलको इन्ज्युरी समयमा पेनाल्टीमार्फत डिलन डे सिल्भाले गोल गरेका थिए ।

यसअघि नेपालले बलियो ठानिएको आयोजक राष्ट्र माल्दिभ्सलाई १–० गोलले पराजीत गरेको थियो । माल्दिभ्स र श्रीलङ्कालाई पराजीत गरेको नेपाली टोलीले लगातार दुई खेलमा जित निकालेको छ ।

लगातार दोस्रो जितसँगै नेपालले दुई खेलमा ६ अंक बनाएर शीर्ष स्थानमा रहेको छ । बंगलादेश २ खेलमा ४ अंक जोड्दै दोस्रो स्थानमा छ  भने भारत एक खेलमा एक अंकसहित तेस्रो स्थानमा छ  ।

नेपालले अर्को खेल असोज २४ गते भारतसँग र असोज २७ गते बाङ्गलादेशसँग खेल्ने छ । प्रतियोगितामा दक्षिण एशियाका पाँच राष्ट्रहरू नेपाल, भारत, माल्दिभ्स, बाङ्गलादेश र श्रीलङ्का सहभागी रहेका छन् ।

प्रतियोगितामा सबै राष्ट्रले एकले अर्कोसँग (राउण्ड रोविन लिग) खेल्ने छन् । राउण्ड रोविनका आधारमा शीर्ष स्थानमा रहेका दुई टोलीले फाइनल खेल्ने छ । फाइनल खेल आगामी असोज ३० गते हुने छ ।