काठमाडौँ । प्रमुख सत्तारुढ दल नेपाली कांग्रेसको १४ औँ महाधिवेशनअन्तर्गत जिल्ला अधिवेशनहरूमा नेता रामचन्द्र पौडेल समूहले अग्रता कायमै राखेको छ । सुरुदेखि नै अग्रता बनाएको पौडेल समूहले १० जिल्लाको अधिवेशनको नतिजा आउँदासम्म अग्रतालाई कायमै राखेको हो ।

अहिलेसम्म अधिवेशनको नतिजा प्रकाशित हुँदा पौडेल समूहले ६ जिल्लामा नेतृत्व हात पारेको छ । यस्तै, संस्थापन पक्ष अर्थात प्रधानमन्त्रीसमेत रहेका सभापति शेरबहादुर देउवा समूहले ४ जिल्लामा नेतृत्व हात पारेको छ ।

कांग्रेसले दसैँअगाडि २१ हिमाली लिल्लाको अधिवेशन सम्पन्न गर्ने तयारी गरिरहेको छ । त्यसमध्ये १० जिल्लाको नतिजा आउँदासम्म पौडेल समूहले अग्रता कायम गरेको हो ।

संस्थापन समूहबाट मनाङमा शंकर गुरुङ, हुम्लामा मोहनविक्रम सिंह, ताप्लेजुङमा गजेन्द्र तुम्याहाङ र रामेछापमा पूर्णबहादुर तामाङ (कान्छाराम) निर्वाचित भएका छन् ।

त्यस्तै, पौडेल समूहबाट मुस्ताङमा रोमी गौचन थकाली, कालिकोटमा अम्मबहादुर शाही, रुकुम पूर्वमा केशरमान रोका, संखुवासभामा दीपक खड्का, गोरखामा नन्दप्रसाद न्यौपाने र दोलखामा बर्मा लामा निर्वाचित भएका छन् ।

यसले पौडेल समूह एक भए देउवालाई सभापतिमा गाह्रो हुने संकेत देखाएको छ । जिल्ला निर्वाचन सम्पन्न भएका जिल्लाहरूमा महाधिवेशन प्रतिनिधि भने कसको पक्षमा धेरै आएका छन् भन्ने अहिलेसम्म एकीन हुन सकेको छैन ।