काठमाडौं । नेकपा (माओवादी केन्द्र)ले पार्टीबाट मन्त्रीका लागि चार जनाको नाम सिफारिस गरेको छ ।

गठबन्धन दलहरुबीच मन्त्रीको भागबण्डा टुंगिएपछि बुधबार बसेको स्थायी समिति बैठकले एक राज्यमन्त्रीसहित चार जनाको नाम टुंगो लगाएको हो ।

माओवादी केन्द्रीय कार्यालय पेरिशडाँडामा बुधबार बसेको स्थायी समिति बैठकले देवेन्द्रराज पौडेल, महेश्वर गहतराज र शशी श्रेष्ठलाई मन्त्रीका लागि सिफारिस गरेको छ । माओवादी केन्द्रले बोधमाया यादवलाई भने राज्यमन्त्रीका लागि सिफारिस गरेको छ ।

यसअघि माओवादी केन्द्रको तर्फबाट शेरबहादुर देउवा नेतृत्वको सरकारमा दुई मन्त्री सहभागी भइसकेका छन् । देउवा सरकारमा जनार्दन शर्मा अर्थमन्त्री र पम्फा भुसाल ऊर्जामन्त्री रहेका छन् ।

बुधबार मन्त्रीको लागि सिफारिस गरिएकाहरुलाई कुन कुन मन्त्रालय भन्ने चाहीँ खुलाइएको छैन ।

बुधबार नै जनता समाजवादी पार्टी (जसपा)ले आफ्नो पार्टीको भागमा परेको चार मन्त्रीको टुंगो लगाउने विहानदेखि कसरत गरिरहेको छ ।