काठमाडौं । नेपाली कांग्रेसको १४ औं महाधिवेशनअन्तर्गत जिल्लाको अधिवेशन भइसक्दा पनि विभिन्न ठाउँमा क्रियाशील सदस्यताको विवाद नटुंगिएको भन्दै रामचन्द्र पौडेलसमूहले पार्टी सभापति शेरबहादुर देउवाको ध्यानाकर्षण गराएका छन् ।

प्रधानमन्त्रीको सरकारी निवास बालुवाटार पुगेर उनीहरुले पार्टी केन्द्रीय कार्यालय सानेपासहित विभिन्न ठाउँमा भइरहेको अनसनको बारेमा ध्यानाकर्षण गराएका हुन् ।

क्रियाशील सदस्यताको माग गर्दै पार्टी केन्द्रीय कार्यालय सानेपा तथा प्रदेश २ को रौतहट र सर्लाहीमा कांग्रेस कार्यकर्ताहरु अनसनमा छन् ।

क्रियाशील सदस्यताको विषयलाई लिएर रौतहटका पार्टी नेता कार्यकर्ता तीन महिनादेखि पार्टी कार्यालयमै अनशन बसिरहेका छन् ।

त्यस्तै, सर्लाहीका गोविन्दराम यादव एक सातादेखि क्रियाशील सदस्यताको विषयलाई लिएर आमरण अनशनमा छन् ।

कांग्रेस बरिष्ठ नेता पौडेल, महामन्त्री डा. शशांक कोइराला र नेता प्रकाशमान सिंह बुधबार बालुवाटार पुगेर प्रधानमन्त्री देउवालाई अनसनमा बसेकाहरुको समस्या सुन्न आग्रह गरे ।

क्रियाशील सदस्यताको विवाद नटुंगिदासम्म महाधिवेशनसमेत हुन नहुने पौडेलपक्षको अडानपछि महाधिवेशनको मिति फेरि पछाडि सार्न नेताहरु सहमत भएका छन् ।

प्रधानमन्त्री देउवा र पौडेल पक्षबीच मन्त्री भागबण्डाको विषयमा पनि छलफल भएको बताइएको छ ।