काठमाडौं । नेपालगञ्जबाट पैदल हिडेर राजधानिस्थित माईतिघरमा हिंसा पिडितहरुको नेतृत्व गर्ने रुबी खानलाई उपस्थित गराउन सर्वोच्च अदालतले फेरि आदेश दिएको छ ।

पीडितका पक्षबाट अधिवक्ता मोहना अन्सारीले पूरक निवेदन दर्ता गरेसँगै अदालतले फेरि प्रहरी प्रधान कार्यालयलाई नै सो आदेश दिएको हो । यसअघि सर्वोच्च महानगरीय प्रहरी वृत्त सोह्रखुट्टेलाई २४ घण्टाभित्र बन्दी अवस्थाकी खानलाई अदालतमा उपस्थित गराउन आदेश दिएको थियो । तर अदालतलाई सोह्रखुट्टे प्रहरीले रुबी खान कहाँ छन् भन्ने थाहा नभएको गैरजिम्मेवार जवाफ दिएको थियो ।

रुबी न्यायका लागि नेपालगञ्जबाट काठमाडौंसम्म पैदल यात्रा गरेकी थिइन् । हिंसा पीडित परिवारको नेतृत्व गर्दै आएकी खानलाई प्रहरी शुक्रबार माइतीघरबाट पक्राउ गरेको हो । तर उनलाई यसअघि नै सम्बन्ध विच्छेद गरेपनि बहुविवाहको आरोपमा पक्राउ गरिएको बताइएको छ ।

उनलाई पक्राउ गरेर कसैलाई भेट्न नदिएकाले रुबीको अवस्था अज्ञात रहेको भन्दै अधिवक्ता मोहना अन्सारीले सर्वोच्चमा बन्दीप्रत्यक्षीकरणको रिट निवेदन दायर गरेकी हुन् ।