काठमाडौँ । साफ च्याम्पियनसिपमा उपविजेता भएको राष्ट्रिय फुटबल टोलीका खेलाडीलाई जनही ५ लाख रुपैयाँ प्रदान गर्ने भएको छ । सोमबार बसेको मन्त्रिपरिषद्को बैठकले खेलाडीहरूलाई जनही ५ लाख रुपैयाँ प्रदान गर्ने निर्णय गरेको हो ।

यस्तै, प्रशिक्षकलाई जनही ३ लाख रुपैयाँ प्रदान गर्ने सूचना तथा सञ्चारमन्त्री ज्ञानेन्द्रबहादुर कार्कीले जानकारी दिए । माल्दिभ्समा सम्पन्न साफ च्याम्पियनसिपमा नेपालले ऐतिहासिक सफलता हात पार्दै पहिलोपटक फाइनल पुगेको थियो ।

तर, फाइनलमा भारतसँग ३–० गोलले पराजित भएको नेपाल उपविजेता बनेको हो । नेपाली टोली आज मात्रै स्वदेश फर्किएको थियो ।