काठमाडौँ । नेकपा माओवादी केन्द्रले राष्ट्रिय सम्मेलनका लागि जारी गरेको कार्य तालिका संशोधन गरेको छ । मंगलबार बिहान बसेको स्थायी कमिटी बैठकले पार्टी सदस्यता नवीकरण, पालिका सम्मेलन, प्रदेश सम्मेलन लगायतको मिति संशोधन गर्ने निर्णय गरेको हो ।

पार्टी कार्यालय पेरिसडाँडामा पत्रकारलाई दिएको जानकारीअनुसार पार्टी सदस्यता नवीकरणको म्याद कात्तिक २५ गतेसम्म थपिएको छ ।टोल सम्मेलन कात्तिक २७ गतेसम्म, वडा सम्मेलन मंसिर ४ गतेसम्म, पालिका सम्मेलन मंसिर ११ गतेसम्म र प्रदेश सम्मेलन मंसिर २५ गतेसम्म म्याद थपिएको हो ।

यस्तै, माओवादी केन्द्रले १४९ जनाको केन्द्रीय सल्लाहकार समिति र ९९ सदस्यीय ज्येष्ठ कम्युनिष्ट मञ्च गठन गर्ने भएको छ । यसैगरी निर्वाचन आयोग, लेखा आयोग र अनुशासन आयोग २५–२५ सदस्यीय गठन गरेको छ ।