काठमाडौँ । प्रधानमन्त्री शेरबहादुर देउवाले बोलाएको मन्त्रिपरिषद्को बैठक प्रधानमन्त्री तथा मन्त्रिपरिषद्को कार्यालय सिंहदरबारमा सुरु भएको छ । केही दिनदेखि देशभर भएको अविरल वर्षासँगै आएको बाढी पहिरोबारे छलफल गर्न विपद् जोखिम न्यूनीकरण तथा व्यवस्थापन राष्ट्रिय परिषदको बैठकपछि मन्त्रिपरिषद्को बैठक सुरु भएको हो ।

बैठकमा बाढी तथा पहिरोबाट भएको जनधनको क्षतिमा परेका पीडित परिवारलाई राहत तथा मृतकका परिवारलाई क्षतिपूर्ति दिने सन्दर्भमा आवश्यक छलफल हुने भएको छ । प्रधानमन्त्री देउवाले बाढी पहिरो प्रभावित तथा मृतकका परिवारलाई उचित राहत दिने घोषणा गरिसकेका छन् ।

सिंहदरबारस्थित विपद् जोखिम न्यूनीकरण तथा व्यवस्थापन राष्ट्रिय परिषदको बैठकमा प्रधानमन्त्री देउवाले देशभर भएका क्षतिको विषयमा ब्रिफिङ लिएका थिए । सोही क्रममा उनले मृतकका परिवारका साथै प्रभावितलाई उचित राहत दिने घोषणा गरेका थिए ।