काठमाडौं । देशका विभिन्न जिल्लामा परेको अविरल वर्षाका कारण आएको बाढी र पहिरोबाट ७७ जनाको मृत्यु भएको छ । मंगलबार रातिदेखि बुधबार साझँ ५ बजेसम्म विपद् व्यवस्थापन महाशाखाका अनुसार ७७ जनाको मृत्यु भएको हो ।

घटनामा २७ जना बेपत्ता र २२ जना घाइते भएको महाशाखाले जनाएको छ । महाशाखाका अनुसार देशका विभिन्न स्थानमा आएको बाढी र पहिरोका कारण ७७ जनाको मृत्यु, २७ जना वेपत्ता र २२ जना घाईते भएका छन् ।

वर्षाका कारण घर गुमाएका परिवारलाई घर निर्माण गर्न ५ लाख रुपैयाँसम्म आर्थिक सहयोग प्रदान गर्ने भएको छ । बुधबार बसेको मन्त्रिपरिषदको बैठकले पहाडमा घर बनाउन ४ लाख, हिमालमा ५ लाख र तराईमा ३ लाख दिने निर्णय गरेको हो ।

घर निर्माण गर्न जग्गाको अभाव भएमा थप ३ लाख रुपैयाँ प्रदान गर्नेसमेत बैठकले निर्णय गरेको छ । यस्तै विपद् व्यवस्थापन समितिको तर्फबाट घरविहीन भएका परिवारहरुलाई तत्काल ५० हजार रुपैयाँ उपलब्ध गराउने निर्णय भएको थियो ।