काठमाडौं । प्रमुख प्रतिपक्षी दल नेकपा एमालेको पार्टी स्थायी कमिटी बैठक आज बस्दैछ। एमाले कार्यालय सचिव शेरवहादुर तामाङका अनुसार बैठक अपरान्ह ३ बजे ललितपुरको तुल्सीलाल स्मृति प्रतिष्ठानमा बस्न लागेको हो ।

एमालेले गत असोज १५ देखि १७ सम्म ललितपुरको गोदावरीमा सम्पन्न गरेको एमालेको विधान महाधिवेशनको समीक्षा, विधान महाधिवेशनपछि राजनीतिक , संगठनात्मक र विधानमा सहभागीहरुको सुझाव पछि परिमार्जित गरिएको प्रतिवेदन र हालै छाप्न प्रकाशनमा पठाईएको विधान तथा वडा र स्थानीय तहको अधिवेशनलगायत एजेन्डामा छलफल गर्न एमालेले आजको स्थायी कमिटी बैठक बोलाएको हो ।

एमालेले कात्तिक ६ मा देशभर एकैपटक वडा अधिवेशन आयोजना गदैछ । वडा अधिवेशन अध्यक्ष केपी ओलीले भर्चुअल माध्यमबाट एकैसाथ उदघाटन गदैछन् । तर वडा अधिवेशन हतारमा आयोजना गर्न लागेको भन्द्यै वाग्मति प्रदेशकी मुख्यमन्त्री एवंम उपाध्यक्ष अष्टलक्ष्मी शाक्यले पार्टीको बागमति प्रदेश कमिटिको बैठकमा असन्तुष्टि पोखेकी थिइन् ।

एमालेले मंसिर १० देखि १२ गतेसम्म पार्टीको दशौं महाधिवेशन आयोजना गर्ने गरी मिति तय गरिसकेको छ । तर महाधिवेशन कुन स्थानमा गर्ने भन्ने एमालेले तय गरिसकेको छैन । वुटवलमा आयोजना गर्ने गरी प्रस्ताव आएपनि त्यसको स्थान ठोस भएको छैन ।

आज बस्ने बैठकले महाधिवेशनस्थलका बारेमा ठोस निर्णय लिने अध्यक्ष केपी ओलीले हिजो नै वताईसकेका छन् । आजको बैठकले महाधिवेशन स्थल तय गर्नेछ ।

त्यस्तै एमाले बैठकले राष्ट्रिय महाधिवेशनको विषय प्रवेश र हालैको अविरल वर्षाले भएका जनधनको क्षतिका सम्बन्धमा छलफल गर्ने पनि एजेन्डा छन्।
त्यस्तै कात्तिक ९ गते पालिका अधिवेशन गर्ने एमालेले यस अगाडी नै कार्यतालिका बनाईसकेको छ।