काठमाडौँ । प्रदेश १ का मुख्यमन्त्री भीम आचार्यले विश्वासको मत लिँदैछन् । सोमबार बस्ने प्रदेशसभाको बैठकमा मुख्यमन्त्री आचार्यले विश्वासको मत लिन लागेका हुन् ।

आज साढे १२ बजे बस्ने प्रदेश १ को प्रदेशसभा बैठकमा मुख्यमन्त्री आचार्यले पेस गरेको विश्वासको मत सम्बन्धि प्रस्तावमाथि छलफल गरेर मत विभाजन गर्ने कार्यसूची तय गरिइएको छ । नेकपा एमाले विभाजन भएर प्रदेशसभाका १० सांसदले एमाले छाडेर एकीकृत समाजवादीमा सनाखत गरेपछि मुख्यमन्त्री आचार्य अल्पमतमा परेका थिए ।

गत भदौ १० गते मुख्यमन्त्रीमा नियुक्त भएका आचार्य एमालेको विभाजन भएपछि अल्पमतमा परेका थिए । संवैधानिक व्यवस्था अनुसार यही कात्तिक ७ गते विश्वसको मत लिने तयारीमा रहेका आचार्य कांग्रेस र एमालेको आग्रहमा प्रदेशसभाको बैठक आजसम्मका लागि स्थगित गरिएको थियो । ९२ सांसद रहेको प्रदेश सभामा बहुमतका लागि ४७ सांसदको आवश्यक पर्छ ।

मुख्यमन्त्री आचार्यसँग एमालेका ३९ सांसद रहेका छन् । यस्तै विपक्ष गठबन्धनसँग ५० सांसद रहेको बताइएको छ । जसमध्ये नेपाली कांग्रेससँग २१, नेकपा माओवादी केन्द्रसँग १५, नेकपा एकीकृत समाजवादीमा १०, जनता समाजवादीमा तीन र संघीय लोकतान्त्रिक राष्ट्रिय मञ्चका एक सांसद रहेका छन् भने एक स्वतन्त्र सांसद रहेका छन् । प्रदेश सभाको अंक गणित अनुसार विपक्ष गठबन्धको सरकार बन्ने निश्चित छ ।

आइतबार बसेको विपक्ष गठबन्धनको बैठकले मुख्यमन्त्री आचार्यको विपक्षमा मत दिने निर्णय गरेको थियो । गठबन्धनले मुख्यमन्त्री आचार्यको विपक्षमा एकजुट भएर मतदान गर्ने निर्णय गरेको थियो । यस्तै गठबन्धनको बैठकले एकीकृकत समाजवादी प्रदेश एकका संसदीय दलका नेता राजेन्द्र राइलार्य आगामी मुख्यमन्त्रीको रुपमा अघि सारेको छ ।

गठबन्धनको तर्फबाट मुख्यमन्त्रीको साझा उम्मेद्वारका रुपमा राइलाई अघि सारेको हो । यस्तै मुख्यमन्त्री आचार्यले विश्वसको मत लिनुभन्दा अगाडि नै मुख्यमन्त्रीबाट राजीनामा दिन सक्ने पनि बताइएको छ । प्रदेश सभामा एमाले अल्पमतमा रहेकाले मुख्यमन्त्री आचार्यले विश्वासको मत पाउने सम्भावना छैन । विश्वासको मत नपाउने देखिएपछि मुख्यमन्त्री आचार्यले प्रदेश सभालाई सम्बोधन गरेर पदबाट राजीनामा दिने तयारी भएको बताइएको छ ।