काठमाडाैँ । राष्ट्रिय स्वतन्त्र पार्टी (रास्वपा) छाड्ने क्रम पछिल्ला दिनमा ह्वात्तै बढ्दै गएको छ ।

राष्ट्रिय स्वतन्त्र पार्टी (रास्वपा) मकवानपुरका सभापति भरत पराजुलीले आज बिहान पार्टी परित्याग गरि नेपाली कांग्रेसमा प्रवेश गरेकामा आजै रास्वपा दोलखाका नेता तथा बागमती प्रदेश समिति सदस्य हरि चौलागाईं र पश्चिम नवलपरासीमा  सुस्ता गाउँपालिकाका सचिव कृष्णप्रसाद पन्थले पनि रास्वपा छाडेको घोषणा गरेका छन् ।

राष्ट्रिय स्वतन्त्र पार्टी (रास्वपा) छाड्ने नेताहरूले पछिल्लो समय पार्टीभित्र सुशासन र आन्तरिक लोकतन्त्र समाप्त भएको आरोप लगाएका छन् । पार्टी विधि, पद्धतिबाट नचलेको भन्दै प्रश्न उठाइरहेका छन् भने आर्थिक पारदर्शितालाई लिएर पनि नेतृत्वमाथि गम्भीर प्रश्न उठाएका छन् ।

२०७९ सालको निर्वाचनमा काठमाडौँ क्षेत्र नम्बर ५ का उम्मेदवार रहेका डा. प्रणयशमशेर राणाले फागुन ७ गते पार्टी छाडे । उम्मेदवार छनोट प्रक्रिय पारदर्शी नभएकोमा असन्तुष्टि पोखेका उनी नेपाली कांग्रेस प्रवेश गरेका छन् । 

सोही दिन बागमती प्रदेशका उपसभापति दिनेश हुमागाईंले उम्मेदवार छनोटमा आर्थिक चलखेल भएको आरोप लगाउँदै पार्टी परित्याग गरेको घोषणा गरे । हुमागाईं अघिल्लो निर्वाचनमा काभ्रे क्षेत्र नम्बर २ बाट रास्वपाका उम्मेदवार थिए ।

मधेस प्रदेशका संस्थापक सभापति ममता शर्माले पनि पार्टीभित्र विधि, पद्धति र आर्थिक पारदर्शिता नभएको आरोप लगाउँदै फागुन ६ गते रास्वपा छोडिन् ।

रास्वपा छाड्ने धेरै नेताहरु अहिले नेपाली कांग्रेस प्रवेश गरिरहेका छन् ।

रास्वपा छाड्नेमा संस्थापक सदस्य खेमकुमारी भुर्तेल (उर्मिला), नुवाकोट जिल्ला सदस्य अशोक थापा, रुपन्देही क्षेत्र नम्बर १ बाट प्रतिनिधिसभा सदस्य उम्मेदवारमा सिफारिस भएका डा. श्री कुँवर, नवलपरासी (बर्दघाट सुस्ता पश्चिम) बर्दघाट नगरपालिका–१३ का सभापति जितबहादुर हरिजन, बारा जिल्ला सहसचिव पवन चौधरीलगायत रहेका छन् ।  

आजै पार्टी छाडेका सुस्ता गाउँपालिकाका सचिव कृष्णप्रसाद पन्थले रास्वपाको भनाई र गराईमा एकरुपता नभएको र पार्टी अवसरवादीको चङ्गुलमा परेकाले पार्टी छाडेको बताएका छन् ।

जुन आशा रास्वपाप्रति थियो त्यो क्रमशः क्षिण हुँदै गएकाले बाध्य भएर पार्टी छाड्नुपरेको उनले बताए ।

इमान्दार नेता कार्यकर्तालाई पाखा लगाउने र अवसरवादीहरुलाई पार्टीमा भित्र्याउने काम भइरहेको पन्थले बताए । अब आफू कुनै पार्टीमा प्रवेश नगरी स्वतन्त्र बस्ने पन्थले बताए । दुई दिन अगाडि मात्रै सुस्ताकै रास्वपा उपसभापति गुप्त सेन ठकुरीले पनि पार्टी छाडेका थिए ।

उनले पनि पार्टीको भनाई र गराईमा एकरुपता नदेखिएको र देशलाई निकास दिनसक्ने अवस्था नदेखेर पार्टी छाडेको बताएका थिए । कांग्रेसका नेता बिक्रम खनाललाई रास्वपा भित्र्याएर टिकट दिएपछि सो क्षेत्रका रास्वपाका कार्यकर्ता असन्तुष्ट देखिएका हुन् ।