काठमाडौँ । आइसीसी टी २० विश्वकप क्रिकेटमा सोमबार एक खेल हुँदै छ । विश्वकपअन्तर्गत आजको खेलमा इंग्ल्याण्ड र श्रीलंका भिड्ने छन् ।

सारजाह रंगशालामा हुने खेल राति ७ः४५ बजे सुरु हुने छ । समूह १ मा रहेको इंग्ल्याण्ड ३ खेलमा अपराजित रहेको छ । इंग्ल्याण्ड ६ अंक जोडेर समूहको शीर्ष स्थानमा रहेको छ ।

इंग्ल्याण्डले यसअघि वेस्ट इण्डिज, बंगलादेश र अष्ट्रेलियालाई हराएको थियो । श्रीलंका भने ३ खेलमा २ अंक जोडेर चौंथो स्थानमा रहेको छ ।

आज इंग्ल्याण्डलाई हराएर श्रीलंका सेमिफाइनल पुग्ने सम्भावना कायम राख्न चाहन्छ। श्रीलंकाले पहिलो खेलमा बंगलादेशलाई हराएको थियो । तर, दक्षिण अफ्रिका र अष्ट्रेलियासँग पराजित भएको थियो ।

यी दुई देशबीचको पछिल्लो खेलमा इंग्ल्याण्ड हाबी हुँदै आइरहेको छ । पछिल्लो पाँच खेलमा इंग्ल्याण्डले सतप्रतिशत नतिजा आफ्नो पक्षमा पारेको थियो ।