काठमाडौं । सानो छँदा आफुलाई हेपेको र आमालाई घरमा बस्न नदिएको ‘रिसिइबी’ कपिलवस्तुमा आफ्नै छोराले बाबुको हत्या गरेका छन् ।

कपिष्लबस्तु विजयनगर गाउँपालिका–५ बनगाईस्थित पोखरीमा कार्तिक ४ मा ४२ वर्षीय चन्द्रबहादुर थापा ‘गोरे’को शव भेटिएको थियो । चन्द्रबहादुर शिवराज नगरपालिका–९ भगवानपुरका स्थानीय हुन् । चन्द्रबहादुरलाई छोरा र ‘भदा’ नाता पर्ने जेठानको छोरा मिलेर हत्या गरेको अनुसन्धानबाट थाहा भएको जिल्ला प्रहरी कार्यालय कपिलवस्तुले जनाएको छ ।

हत्या आरोपमा चन्द्रबहादुरका छोरा जयन पुनमगर उर्फ अशोक र जेठानको छोरा मुकेश महरा उर्फ किरणलाई प्रहरीले पक्राउ गरेको छ । प्रहरीका अनुसार सानो छँदा आफुलाई हेपेको र आमालाई घरमा बस्न नदिएको ‘रिसिइबी’ साँधेर जयनले मुकेश महरासँग मिलेर हत्या गर्ने योजना बनाएका थिए ।

मादक पदार्थ सेवन गरेर बुवा चन्द्रबहादुरलाई मुकेशको स्कुटरमा राखेर बनगाईस्थित पोखरी नजिकै लगेर उनीहरुले कुटपिट तथा घाँटी कसेर हत्या गरेका थिए । हत्यापछि मृतकलाई पोखरीमा फालेर आरोपीहरु फरार भएको जिल्ला प्रहरी कार्यालय कपिलबस्तुले जनाएको छ ।

हत्याअघि मुकेशको मोवाइल हराएको थियो । सो मोबाइल चन्द्रबहादुरले चोरेको आशंकामा मुकेशले जयनलाई झड्केलो बुवाको हत्यामा सहयोग गरेका थिए । घटनामा प्रयोग भएको लु.४६ प ४१८९ नम्बरको स्कुटर र घाँटी कस्न प्रयोग गरिएको कपडा प्रहरीले बरामद गरेको छ ।