काठमाडौँ । आईसीसी टी–२० विश्व कप क्रिकेटमा भारत विजयी भएको छ । गएराति यूएईको दुबईमा भएको खेलमा नामिबियालाई नौ विकेटले पराजित गर्दै भारत विजयी भएको हो ।

नामिबियाले दिएको १३३ रनको लक्ष्य भारतले २८ बल अघि एक विकेट गुमाएर भेट्टायो । भारत र नामिबिया यसअघि नै सेमिफाइनल नपुगी बाहिरिसकेकाले सोमबारको खेल प्रतिष्ठाको लागि मात्रै थियो । यसैबीच, भारतीय कप्तान विराट कोहली कप्तानीबाट अलग भएका छन् । विश्व कप क्रिकेटपछि कप्तानी छाड्ने यसअघि नै घोषणा गरेअनुसार विराटले कप्तानी छाडेका हुन् ।

विश्व कप क्रिकेटको सेमिफाइनलमा बुधबार न्युजिल्यान्ड र इङ्ल्यान्ड तथा बिहीबार पाकिस्तान र अस्ट्रेलिया खेल्दैछन् । फाइनल खेल आइतबार हुनेछ।