काठमाडौँ । नेपाल बार एशोसियसनले प्रधानन्यायाधीश चोलेन्द्र शमसेर जबरालाई सर्वोच्च अदालत प्रवेश गर्न नदिने भन्दै आन्दोलनको घोषणा गरेपछि सर्वोच्च अदालतमा कडा सुरक्षा व्यवस्था गरिएको छ । बारले आज प्रधानन्यायाधीश जबरालाई सर्वोच्च अदालत प्रवेशमा रोक लगाउन आन्दोल गरिरहेको छ ।

शुक्रबार बिहान बारमा आवद्ध कानून व्यवसायीले सर्वोच्च अगाडि धर्ना दिएर प्रधानन्यायाधीशलाई कार्यकक्षमा प्रवेश रोक्ने रणनीति लिएका छन् । त्यसलाई मध्यनजर गरी सशस्त्र प्रहरी, नेपाल प्रहरी र महानगर प्रहरीलाई सर्वोच्चमा तैनाथ गरिएको छ । यस्तै महान्यायाधीवक्ताको कार्यालय र बारको कार्यालय तर्फबाट सर्वोच्च आउ–जाउ गर्ने भित्री ढोका बन्द गरिएको छ ।

प्रधानन्यायाधीश सर्वोच्च अदालतभित्र प्रवेश गर्ने गेटमा पनि ताला लगाएको बताइएको छ । सेवाग्राही र अन्य व्यक्ति प्रवेश गर्ने सडकतर्फको गेटमा सुरक्षाकर्मीहरु परिचालित गरिएको छ । प्रधानन्यायाधीश जबराको राजीनामा माग गर्दै बारको नेतृत्वमा कानुन व्यवसायीहरुले सर्वोच्चमा प्रदर्शन गर्दै आएका छन् । बिहीबारको प्रदर्शनमा प्रहरीले बल प्रयोग गर्दा ६ जना कानुन व्यवसायीहरु घाइते भएका थिए । त्यसपछि बारले आज प्रधानन्यायाधीशलाई सर्वोच्च प्रवेशमा रोक लगाउने घोषणा गरेको थियो ।