काठमाडौं । त्रिभुवन विश्व विद्यालयका चार पूर्व उपकुलपतिहरुले बार एशोसिएशनको आन्दोलनको न्यायोचित निकासका लागि सरकार र राजनीतिक दलहरुको ध्यानाकर्षण गराएका छन् ।

त्रिविका पूर्व उपकुलपतिहरु महेशकुमार उपाध्याय, केदारभक्त माथेमा, कमलकृष्ण जोशी र नविनप्रकाश जंग शाहले संयुक्त रुपमा सरकार राजनीतिक दलहरुको ध्यानाकर्षण गराएका हुन् ।

लामो समयदेखि सर्वोच्च अदालतमा भइरहेको बार एसोशिएसनको आन्दोलन र जिम्मेवार निकायहरुले त्यसप्रति देखाएको उदासिनाता देशकै लागि ठूलो दुर्भाग्यको विषय बनेको उनीहरुले जनाएका छन् ।

न्यायालयप्रति जनताको विश्वासमा स्खलन आउन नदिन पनि आन्दोलनले अबिलम्ब निकास पाउन जरुरी रहेको उनीहरुको सुझाव छ ।

‘न्यायालयले जनताको विश्वास गुमाएपछि न्याय पाउन जनता कहाँ जाने ?’ उनीहरुले भनेका छन, ‘यस्तो स्थितिप्रति सरकार र राजनीतिक दलहरु संवेदनहीन भएर बस्नु भनेको अत्यन्त आश्चार्यलाग्दो छ ।’

‘जनताले सरकारलाई गैरजिम्मेवार र राजनीतिक दलहरुलाई अवसरवादीको आक्षेप लगाउनेस्थिति नआओस् भन्ने हामी चाहन्छौं ।’– ध्यानाकर्षणपत्रमा भनिएको छ ।

आन्दोलनसँग गाँसिएको स्थितिको सुधार र समस्याको समाधानतर्फ सरकार र दलहरुलाई अबिलम्ब पाइला चाल्न पनि उनीहरुले आग्रह गरेका छन् ।