कैलाली । कैलालीको टीकापुरमा गत मंगलबार राति धारिलो हतियार प्रहार गरेर युवकको हत्या गरेको आरोपमा प्रहरीले थप एक जनालाई पक्राउ गरेको छ । धारिलो हतियार प्रहार गरेर लम्कीचुहा नगरपालिका १ का भूपेन्द्र बडुवालको हत्या प्रकरणमा संलग्न भएको आरोपमा लम्कीचुहा ५ का २४ वर्षीय विकास खड्कालाई पक्राउ गरिएको प्रहरीले जनाएको छ।

जिल्ला प्रहरी कार्यालय कैलालीका प्रमुख प्रहरी उपरीक्षक (एसपी) विश्व अधिकारीले खड्कालाई लम्की क्षेत्रबाटै पक्राउ गरिएको जानकारी दिए । उनका अनुसार उक्त घटनामा मुख्य योजनाकार भनिएका चिसापानीका नवीन रावलसहितका अन्य ७ जना अझै फरार रहेको बताउँदै एसपी अधिकारीले उनीहरूको खोजी कार्य जारी राखिएको बताए ।

गत २३ कात्तिकमा टीकापुर नगरपालिका १ स्थित सिद्धार्थ होटल नजिकै बडुवालको धारिलो हतियार प्रहार गरेर हत्या गरिएको थियो । प्रहरीले उनको हत्यामा संलग्न भएको आरोपमा यसअघि ८ जनालाई पक्राउ गरिसकेको छ ।