काठमाडौँ । सत्तारुढ गठबन्धनको उच्चस्तरीय राजनीतिक समन्वय समितिका संयोजक रामचन्द्र पौडेलले समितिको पहिलो बैठक बोलाएका छन् । उनले मंगलबार सिंहदरबारस्थित प्रधानमन्त्री कार्यालयमा बैठक बोलाएका हुन् ।

बैठकमा समसामयिक राजनीति, आसन्न राष्ट्रियसभा निर्वाचन, समितिको कार्यविधि, समितिको सचिवालय बनाउने लगायतका विषयमा छलफल हुने बताइएको छ । समिति गठन गरेको दिन कात्तिक ३० गते पहिलो बैठक गर्ने सहमति भएको थियो । त्यसै अनुसार आज बैठक बोलाइएको हो ।

समन्वय समितिमा नेपाली कांग्रेसबाट पौडेल र पूर्वमहामन्त्री कृष्णप्रसाद सिटौला, नेकपा माओवादी केन्द्रबाट अध्यक्ष पुष्पकमल दाहाल र नेता नारायणकाजी श्रेष्ठ, नेकपा समाजवादीबाट अध्यक्ष माधवकुमार नेपाल, जसपाबाट उपेन्द्र यादव तथा राष्ट्रिय जनमोर्चाबाट चित्रबहादुर केसी र दुर्गा पौडेल छन् । यस्तै समितिमा सरकारका तर्फबाट सञ्चारमन्त्री ज्ञानेन्द्रबहादुर कार्की पनि छन् ।