काठमाडौं । नेत्रविक्रम चन्द ‘विप्लव’ नेतृत्वको नेपाल कम्युनिस्ट पार्टीले इन्धनमा भएको मूल्यवृद्धिको विरुद्ध मंगलबार गराएको बन्दले देशका अधिकांश क्षेत्र प्रभावित भएको छ ।

बन्द आयोजक विप्लव समूहका कार्यकर्ताहरु विहानैदेखि सडकमा आगो बाल्न र बन्द गराउँदै हिँडे ।

केन्द्रीय राजधानी काठमाडौंकै विभिन्न ठाउँहरुमा विप्लवका कार्यकर्ताहरुले सडकमा टायर बालेर बाटो अवरोधको प्रयत्न गरे ।

पूर्व–पश्चिम मुख्य राजमार्गको विभिन्न ठाउँमा विहानैदेखि सडकमा टायर बालेर बन्दको जनाउँ दिँदै हिँडिरहँदा दाङमा भने विप्लवका कार्यकर्ताहरुले सिर्जनात्मक काम गरेका छन् ।

उनीहरुले दाङको मुख्य सडकको जेब्रा क्रसिङमा रंग लगाउने काम गरे ।

उनीहरूले तुलसीपुरको वीरेन्द्र चोक लगायतका स्थानमा जेब्रा क्रसिङ बनाएका हुन्।

बन्द गराउनका लागि सडकमा आगो बाल्ने काम गर्नुपर्दैन, अरु सिर्जनशिल काम गरेर पनि बन्द गराउन सकिन्छ भन्ने उदाहरण उनीहरुले प्रस्तुत गरेका छन् ।

अन्यत्र सडकमा टायर बाल्नेदेखि गाडी तोडफोड गर्दै हिँडे पनि विप्लवका दाङका कार्यकर्ताले विहानै सडकमा कुचो लिएर निस्किए । अनि, बाल्टीमा सेतो रंग र ब्रस बोके ।

विहानैदेखि सडक सफा गर्दै उनीहरुले सडक मेटिइसकेको जेब्रा क्रसिङ्मा रंग पोत्ने काम गरे ।

पेन्टिङ गरेपछि उनीहरूले सडक मै ‘एकीकृत जनक्रान्ति जिन्दावाद’, वैज्ञानिक समाजवादी जिन्दावाद जस्ता पार्टीको नारा पनि लेखेका छन्।

विप्लवका कार्यकर्ताको सिर्जनशील कार्यको दाङबासीले भने मुक्तकण्ठले प्रशंशा गरेका छन् ।