काठमाडौं । प्रदेश २ का उद्योग, पर्यटन तथा वनमन्त्री रामनरेश रायलाई मन्त्रीबाट बर्खास्त गरिएको छ ।

प्रदेश २ का मुख्यमन्त्री लालबाबु राउतको सिफारिसमा प्रदेश प्रमुख हरिशंकर मिश्रले मन्त्री रायलाई मंगलबार पदमुक्त गरेका हुन् ।

गठबन्धनको सरकारमा सत्ता समिकरण मिलाउन भन्दै मुख्यमन्त्री राउतले रायलाई राजीनामा दिन भनेका थिए । तर मन्त्री रायले राजीनामा नदिएपछि मुख्यमन्त्री राउतले बर्खास्त गर्न प्रदेश प्रमुखसमक्ष सिफारिस गरेका थिए ।

रायलाई मन्त्रीबाट पदमुक्त गरिएपछि तत्कालका लागि उद्योग, पर्यटन तथा वन मन्त्रालयको कार्यभार मुख्यमन्त्री राउत आफैले सम्हालेका छन् ।

मुख्यमन्त्री राउतले सत्ता गठबन्धनकै दल नेकपा एकीकृत समाजवादीलाई सरकारमा सामेल गर्न आफ्नै पार्टीबाट मन्त्री बनेका रायलाई पदमुक्त गरेका हुन् ।

गठबन्धन सरकारको नेतृत्व गरेका मुख्यमन्त्री राउतले यसअघि सरकारमा नेपाली काँग्रेस र नेकपा माओवादी केन्द्रलाई सामेल गरिसकेका छन् ।