काठमाडौँ । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ स्वास्थ्य केन्द्रहरुको उद्घाटन गर्न जाने भएपछि महोत्तरीको रामगोपालपुर नगरपालिकाले सार्वजनिक विदा दिएको छ । रामगोपालपुर २, ३, ४, ६, ७, ८ र ९ मा निर्माण हुनलागेको आधारभूत स्वास्थ्य केन्द्रहरुको उद्घाटन गर्न प्रचण्ड बुधबार सो नगरपालिका जान लागेका हुन् ।

नगरप्रमुख अशोक कुमार मण्डलले सूचना जारी गरेर सार्वजनिक विदा दिएको जानकारी गराएका छन् । उनले सूचना मार्फत उक्त समारोहमा उपस्थित भई शोभा बढाइ दिन नगरबासीसँग अनुरोध गरेका छन् ।

स्वास्थ्य केन्द्रहरुको उद्घाटन गर्न पूर्वप्रधानमन्त्रीसमेत रहेका प्रचण्डले आउने कार्यक्रम रहेकाले एक दिनका लागि सार्वजनिक विदा दिएको सूचनामा उल्लेख गरिएको छ । अध्यक्ष प्रचण्ड आज रामगोपालपुरको कार्यक्रममा सहभागी हुन जादैछन् ।