काठमाडौं । विज्ञापन बोर्डका अध्यक्ष लक्ष्मण हुमागाँईले बोर्डको सूचनालाई अटेर गरी मदिराजन्य पदार्थको विज्ञापन गर्ने सञ्चारमाध्यमहरुलाई कारबाही गर्ने बताएका छन् ।

विज्ञापन बोर्डका अध्यक्ष हुमागाँईले सूचना प्रकाशित गरिसकेपछि पनि केही सञ्चारमाध्यमहरुमा मदीराजन्य पदार्थहरुको विज्ञापन प्रकाशन भइरहेको उनले बताए ।

अटेर गरेर मदीराजन्य पदार्थहरुको विज्ञापन प्रशारण गर्ने पत्रपत्रिका, विज्ञापन एजेन्सी र विज्ञापनदातालाई कानून बमोजिम कारबाही गरिने उनले बताए ।

न्यूज एजेन्सी नेपालसँगको कुराकानीमा उनले बोर्ड अहिले विज्ञापन प्रशारण गर्ने पत्रपत्रिका, विज्ञापन एजेन्सी र विज्ञापनदाताहरुलाई पत्राचार गर्ने तयारीमा रहेको बताए ।

अध्यक्ष हुमागाँईले ऐनले मदिरा तथा सुर्तिजन्य पदार्थको विज्ञापनमा मात्रै रोक लगाएको बताउँदै बिक्री वितरण र उत्पादनमा रोक नलगाएको स्पष्ट गरे । जनस्वास्थ्य सेवा ऐन २०७५ अनुसार मदिरा, सुर्तिजन्य पदार्थहरुको विज्ञापन गर्न रोक लगाएको उनले बताए ।