नवलपुर । नेपाली कांग्रेसको प्रदेशसभा क्षेत्रीय क्षेत्रीय अधिवेशन अन्तर्गत शनिवार नवलपुरको चार वटै क्षेत्रमा निर्वाचन भइरहेको छ ।

दुई प्रतिनिधिसभा र चार प्रदेशसभा क्षेत्र रहेको नवलपुरमा नेपाली कांग्रेस सभापति शेरबहादुर देउवा र रामचन्द्र पौडेल समूहले छुट्टाछुट्टै प्यानल बनाएर उम्मेदवारी दिएका छन् ।

संघीय क्षेत्र नं १ को प्रदेश सभा निर्वाचन क्षेत्र “क” मा तारापती खरेल र गोपालप्रसाद सापकोटाको नेतृत्वमा प्यानलगत उम्मेदवारी दिएका छन् ।
यस्तै, नम्बर १ (ख)मा प्रदिप घिमिरे र हेमप्रसाद पाण्डे प्यानल गराएर चुनाबी मैदानमा होमिएका छन् । उद्योगपति विनोद चौधरीले पनि सोही क्षेत्रमा गएर मतदान गरेका छन् ।

यसैगरी नवलपुर क्षेत्र नम्बर २ (क) मा रामचन्द्र भण्डारी र ऋषिराम कंडेल प्यानलसहित उम्मेदवारी दिएका हुन् भने नवलपुर क्षेत्र नम्बर २(ख) मा कृष्णप्रसाद तिवारी र कृष्णबहादुर चौधरी प्यानल चुनावी मैदानमा रहेका छन् ।

काङ्ग्रेसको आसन्न १४ औं महाधिवेशन अन्तर्गत नवलपुरमा ४ वटा प्रदेशसभा निर्वाचन क्षेत्रका ९६ वटा पदमा १९२ जनाले उम्मेदवारी दिएका छन् ।