काठमाडौं । काठमाडौंको दशरथ रंगशालामा जारी ‘ए’ डिभिजन लिग फुटवलमा मनाङ मर्स्याङदी क्लबले विजयी शुरुवात गरेको छ ।

आइतबार त्रिपुरेश्वरस्थित दशरथ रंगशालामा भएको दिनको दोस्रो खेलमा ललितपुरको जावलाखेल युथ क्लबलाई १–० गोल अन्तरले पराजित गर्दै मनाङले सुखद सुरुवात गरेको हो ।

डिफेन्डर दिनेश राजवंशीले खेलको ५७ औं मिनेटमा गरेको गोल जीतका लागि निर्णायक बन्यो । पहिलो हाफमा दुवै टोलीले गोलरहित बराबर खेलेका थिए । जीतसँगै मनाङले तीन अंक जोडेको छ ।

आइतबार नै भएको पहिलो खेलमा ब्रिगेड ब्वाइज क्लबले एपीएफ फुटबल क्लबलाई ३–२ गोलले पराजित गरेको छ ।

ब्रिगेडका लागि दिनेश राईले दुई तथा सुरज गुरुङले एक गोल गरेका थिए भने एपीएफका लागि आशिष लामा र बिक्की तामाङले एक एक गोल फर्काएका थिए ।

लिग अन्तर्गत सोमबार पनि दुई खेल हुनेछ ।

पहिलो खेलमा दुई विभागीय टोली नेपाल पुलिस क्लब र त्रिभुवन आर्मी भिड्नेछन् भने दोस्रो खेलमा साबिक विजेता मच्छिन्द्र फुटबल क्लब र एनआरटीबीच प्रतिष्पर्धा हुनेछ ।